ყველას გვქონია ისეთი, მომენტი როდესაც ჩვენი საყვარელი ფეხსაცმელი გაგვფუჭებია და გვინდოდა, რომ უფრო დიდხანს გაეძლო. ალბათ ოდესმე დაფიქრებულხარ, თუ ხშირ შემთხვევაში რატომ ვერ გვიძლებს ფეხსაცმელი დიდხანს. ამის ბევრი გამომწვევი მიზეზი არსებობს და მათ წინააღმდეგ დროული ნაბიჯების გადადგმაა საჭირო.

ფეხსაცმლის მოვლა აუცილებელია, განსაკუთრებით კი ნატურალური მასალებისგან დამზადებული ფეხსაცმლის, თუ გვსურს, რომ ეს ოსტატების მიერ გაკეთებული ხელოვნების ნიმუში დიდი ხნის განმავლობაში გვემსახუროს. ხელნაკეთი ნატურალური მასალებისგან დამზადებული ფეხსაცმლის შეძენა არის ერთგვარი ჯილდო და სიამოვნება. თუმცა, უმთავრესი გამოწვევა არის, თუ როგორ გავუფრთხილდეთ მას ისე, რომ დიდი ხანი გვემსახუროს. ამიტომ წარმოგიდგენთ, იმ რჩევებს, რომლებიც გაგვიზიარეს ჩვენმა მომწოდებლებმა.

1. არ ატარო ფეხსაცმელი მთელი დღით

ალბათ დაკვირვებულხარ, რომ ახალი ფეხსაცმელი შედარებით მომდგარი და სტანდარტული ფორმისაა, ეს იმიტომ, რომ მას სჭირდება დრო, რათა ფეხის ფორმას მოერგოს. ამისთვის კი გარკვეული დროა საჭირო. ეცადე, რომ როცა ფეხსაცმელი ფეხის ფორმასთან შეგუების პროცესშია, არ ატარო იგი მთელი დღის განმავლობაში, არამედ მაშინ ჩაიცვი, როდესაც იცი, რომ მხოლოდ რამდენიმე საათით გადიხარ საქმეზე. დრო და დრო ჩაცმის ხანგრძლივობა გაზარდე სანამ ფეხი არ მიეჩვევა ახალ ფორმას და მის ძირს.

2. აცადე ფეხსაცმელს დასვენება

ფეხსაცმლის ფორმისა და მისი სიმყარის შესანარჩუნებლად საჭიროა, რომ მასალები, რისგანაც არის დამზადებული, დავასვენოთ. ხშირი და დიდხნიანი გამოყენებისგან ფეხსაცმელი იცვლის ფორმას, ამიტომ იმისათვის, რომ მან აღიდგინოს პირვანდელი ფორმა, ეცადე არ ჩაიცვა ის ორი დღე გადაბმულად. დასვენებისას ფესხაცმელი შეძლებს თავისით გაშრეს ფეხისგან გამოწვეული ტენიანობისა და ოფლისაგან.

3. ჩაცმისას გამოიყენე მაშველი

ალბათ ყველა ჩვენგანს ჰქონია ისეთი მომენტი, როდესაც ფეხსაცმლის ჩაცმა მაშველის გარეშე გვიცდია, თუმცა ან ვერ მოგვირგია, ან უკანა ნაწილზე ისეთი ზემოქმედება მოგვიხდენია, რომ ფეხსაცმელს დეფორმაცია განუცდია. ეცადე, რომ ჩვევად ჩამოგიყალიბდეს მაშველის გამოყენება ფეხსაცმლის ჩაცმისას. ასეთ დროს ფეხსაცმლის საყრდენი, უკანა მიდამო (ტყავის ის ნაწილი, რომელიც ქუსლის მხარესაა სარჩულსა და ფასადს შორის) შეინარჩუნებს თავის სიმტკიცესა და გამძლეობას. 

4. არ გარეცხო ფეხსაცმელი სარეცხ მანქანაში

ერთ-ერთი აუცილებელი ნაბიჯი ფეხსაცმლის სიცოცხლის გასახანგრძლივებლად არის მისი სარეცხ მანქანაში გარეცხვისგან თავიდან აცილება. ნაცვლად ამისა, მოაცილე ჭუჭყი ფეხსაცმელს ხელით და ეცადე ეს გააკეთოთ დაბინძურებისთანავე, რათა ჭუჭყს არ მივცეთ ქსოვილში ან ტყავში ჩაჯდომის საშუალება. ფეხსაცმლის ეფექტური გაწმენდვისთვის ასევე სცადე სპეციალური საწმენდი საშუალებები.

5. გაასუფთავე ფეხსაცმელი ყოველი გამოყენების შემდეგ

ხშირ შემთხვევაში, ფეხსაცმელი პირვალდენ სახეს იმის გამო კარგავს, რომ მას რეგულარულად არ ვწმენდთ. მისი გაწმენდვა ყოველი გამოყენების შემდეგ შეამცირებს იმ მასალების დაზიანებას და გაფუჭებას, რითაც არის შეკერილი. რბილი ჩოთქითა და ბუნებრივი ჯაგრისით მოაცილე ჭუჭყი ფეხსაცმლის ზედაპირიდან და ნაკერებიდან. შემდეგ, თუ კი ფეხსაცმელი ტყავისაა, გამოიყენე მცირე ოდენობით მაპრიალებელი საშუალება, რომელიც დატანილი უნდა იყოს რბილი ნაჭრით. უფრთხილდი ნატურალური მასალების პირდაპირ წყლით გაწმენდვას, ეცადე, რომ მხოლოდ დასველებული ნაჭრით მოაცილო ჭუჭყი ზედაპირიდან.

---

ჩვენ ხშირად ვამბობთ, რომ ნატურალური მასალებისგან დამზადებული ფეხსაცმელი ცოცხალი არსებაა და თუ მას სწორედ მოვუვლით, მაშინ თავისი სილამაზის შენარჩუნება 10-15 წლის განმავლობაშიც კი შეუძლია. მნიშვნელოვანია გაფრთხილების პროცესი იყოს მუდმივი და არა ერჯერადი: ზემოაღნიშნული რეკომენდაციები მსგავსი ნივთების მიმართ უნდა გახდეს თანამედროვე ქალბატონისა და მამაკაცის ყოველდღიურობა. გაითვალისწინე ზემოთ ჩვენს მიერ შედგენილი 5 რჩევა და დატკბი შენი ფეხსაცმლის სილამაზით ხანგრძლივად.